Молитвы Федоровской Божией Матери

Молитвы у иконы Федоровской Божией Матери.

Молитва первая

О Пресвятая Владычице Богородице и Приснодево Марие, единая надежно нам грешным, к Тебе прибегаем и Тебе молим, яко велие имаши дерзновение пред родшимся от Тебе по плоти Господом Богом и Спасителем нашим Иисусом Христом. Не презри слез наших, не возгнушайся воздыханий наших, не отрини скорби нашея, не посрами упования нашего на Тя, но матерними молениями Твоими умоли Господа Бога, да сподобит нас грешных и недостойных свободитися от грехов и страстей душевных и телесных, умрети миру и житии Ему единому во вся дни живота нашего.

Федоровская икона Божией Матери г. Углич

О Пресвятая Владычице Богородице, путешествующим спутешествуй, и ограждай, и охраняй оныя, избави плененных от пленения, свободи страждущих от бед, утеши сущих в печалех, скорбех и напастех, облегчи нищету и всяко злострадание телесное, и даруй всем вся потребная к животу, благочестию и жизни временней. Спаси, Владычице, все страны и грады, и сию страну и сей град, имже сия чудотворная и святая икона Твоя дадеся во утешение и ограждение, избави я от глада, губительства, труса, потопа, огня, меча, нашествия иноплеменных, междоусобныя брани, и отврати всякий гнев на ны праведно движимый. Даруй нам время на покаяние и обращение, избави нас от внезапныя смерти, и во время исхода нашего предстани нам явльшися, Дево Богородице, и избави нас от воздушных мытарств, князей века сего, сподоби на Страшном судищи Христовом стати одесную и соделай нас снаследники вечных благ, да славим во веки великолепое имя Сына Твоего и Бога нашего со Безначальным Его Отцем и Святым, Благим и Животворящим Его Духом, ныне и присно, и во веки веков. Аминь.

Молитва вторая

О Премилосердая Госпоже Царице Богородице, прими миренное моление наше, и не возгнушайся нас, недостойных, но яко Милосердая, не престани молящи Егоже родила еси, да дарует нам прощение многих согрешений наших, да спасет нас имиже весть судьбами.

Помилуй нас, владычице, помилуй нас, несть бо нам спасения от дел. Темже верно вопием Ти: помилуй рабы Твоя, и неплодное сердце наше покажи плодоносно благих дел. Призри на нас, ндостойных. Ты бо упование и покров нащ, жизнь и свет сердцу нашему, яко Невечерний Свет от чрева Твоего воздвигшая, озари душу нашу, Чистая, и отжени всяку мглу сердца нашего. Даруй нам умиление, покаяние, и сокрушение сердечное. Сподоби нас во вся дни живота нашего тварити волю Сына Твоего и Бога нашего и во всем благоугождати Ему Единому. О Богомати, не престани молящи рождшагося от Тебе за вся притекающия с верою к сему чудотворному образу Твоему и подавай им скорую помощь и утешение в скорбех и напастех и злостраданиях, избави их от клеветы и злобы человеческия, от враг видимых и невидимых и всякия нужды и печали. Спаси Отечество наше, царствующий град наш, град сей и вся грады и страны от всяких бед и нужд, и сотвори милостива нам бытии Бога нашего, отврати всякий гнев Его на ны движимый и избави ны от належащего и праведного Его прещения. О Боголюбивая Владычице, Ангелов украшение, мучеников слава и всех святых радосте, с ними моли Господа, да сподобит нас в покаянии скончати живота нашего течение. В смерти же час, Пресвятая Дево, избави нас от власти бесовския, и осуждения, и ответа, и страшного испытания, и мытарств горьких, и огня вечнаго, да сподобльшеся славнаго Царствия Божия, величаем Тя и славим воплощшагося от Тебе Христа Бога нашего, Емуже слава со Отцем и Святым Духом, ныне и присно и во веки веков. Аминь.

Список молитв